தேடி பிடித்து முக நூலில்
சேர்த்த பழைய தோழிகளை
unfriend செய்து வைத்தேன் !
அக்கம் பக்கம் பரிட்சியமில்லா ஊருக்கு
வேலைக்கு விண்ணப்பித்து வைத்தேன் !
அப்படியே தொலைபேசி இணைப்பை துண்டித்து வைத்தேன் !
செல்ல மகள் கட்டியணைக்கும்
கரடி பொம்மையை குப்பையில் எறிந்தேன்.!
அவள் பள்ளி ஆசிரியையிடம் எரிந்து விழுந்தேன் !
நீண்டு வளர்ந்த கூந்தலை வெட்டினேன் ,
நீட்டமாய் நகங்களை வளர்த்தேன் ,
பொன்னகையோடு புன்னகையையும் மறைத்தே வைத்தேன் !
அம்மாவிடம் ரகசியம் காத்தேன் ,
அண்ணியிடம் அடக்கம் பழகினேன் !
உறவினரிடம் தூரம் அனுசரித்தேன் !
கணவனே என்னை - நீ
விவாகரத்து செய்ததில் -நான்
பயந்தது வாழ்க்கையை பார்த்து அல்ல !
ஆண்களை பார்த்தும் அல்ல!
பழகிய என் குல பெண்களை பார்த்தே!
